بحبه تاني

معقولة ممكن تكون بتحب حد، والحد دة ثابت، لكن حبه بيتحرك وبيتطور وبيزيد، وبينتعش وبيـ..مع الزمن!!

يعني يكون ملهوش حدود ممكن، حب ملهوش سقف ممكن، حب ملهوش مساحة زمنية ومش بيتزهق منه، برضه ممكن

انما يكون كل دة، وكمان بيتجدد كل حبة وقت!!..غريبة!!..فعلا غريبة

أنا مستغرباها قوي، بس بتحصلي كل حبة وقت

بتحصلي من حديث جديد ليه أسمعه، من رواية جديدة عنه، بتحصلي لما بحس بحبه ليا ورحمته بيا..حصلتلي لما اتفرجت علي خطي الحبيب من سنتين، وحصلتلي لما الجهلا خطوا بايديهم المذنبة رسومات ساخرة منه، أنا مغضبتش ساعتها بقدر ما حزنت، كان كل اللي مسيطر عليا الاشفاق ع البشرية، لو يعرفوا قد ايه محتاجين هديه!!..وفضل الحب ثابت علي ما وصل اليه، لحد ما زاد تاني مؤخرا..أما حلمت بيه

اللهم صلي وسلم وبارك عليه

صحيح مش شفت وشه، لكن فتحلي دراعاته لما طلبت..أكيد كان زعلان مني، أكيد زعلان لكن فتحلي دراعاته،وعيطت ف حضنه

زمان، أختي كانت بترفض كلمة"سقيم" اللي بيوصف بيها المتصوفين حبهم،لكن أنا كنت بحسها قوي

الحب المتعِب..الحب المرهِق اللي مليان شوق وأحلام باللقا..أنا تعبت بقي من كتر الحب، وتضخمه..أنا عاوزة أشوفه بقي

ولحد ما اشوفه، مش عارفة حيثبت حبي علي كدة، والا حيفضل يعلا ويتوسع ويتطور ويكبر ويـ...ـ