بجد فرحانة انا بفوز منتخبنا الوطني ببطولة أفريقيا..حاسة ان دة الصح، وفرحانة للعيال الرجالة دول..الجيل المؤمن الواعي المتضامن اللي مليان عزم ورايح حاطط عينه علي هدف كبير تتفتفت قدامه كل الاهداف التانية..
مفردات النصر اللي مش بتتغير ابدا..من يوم ما خلق ربنا البشر لحد ما يبعثهم..روح النصر اللي بتنصر ربنا فربنا بينصرها..علامات النصر اللي بتنطبق علي اي مجال ف الدنيا..الروح دي، لو لعبنا بيها بنكسب، ولو حاربنا بيها بننتصر، ولو قاومنا بيها حنرجع ارضنا وحنكسب قضيتنا
-------------------------------------------------------------------------------------والكاس للناس الغلابة..اللي بيتحرق دمهم نقطة نقطة لحد الفوز، واللي بيرفعوا ايديهم لربنا بعد كل صلا دعوات وشكر..الكاس للناس البسطا..اللي مش واخدين منها حاجة، وعارفين انهم حيقعدوا يعدوا مكاسب الولاد المادية برهبة، ومع ذلك لافين بطونهم وقلوبهم بالعلَم ..الكاس للناس الفقرا، اللي متوقعين بعد البطولة زيادة اسعار، وزحمة ف الشوارع، وابتزاز من قبل المسؤلين، واستغلال من قبل المعلنين، ومع ذلك فرحانين من قلوبهم..الكاس مش لسيادة الريس وسيادة جمال الريس وسيادة علاء الريس
الكاس لأمي وأبويا وجيراني..الدهب لينا احنا
هناك ٦ تعليقات:
الكاس
للعطاء
والمجهود
والانتماء
مبروك لمصر كلها
أنا شخصيا كنت ببقى فرحان .. علشا مش هيوقفونا طابور تمام في عز البرد بالليل علشان يعدونا ,.,. مع أن محدش اصلا هيمشي ,. اكيد مش هنط من فوق السور ,.,.
سلام سلاح
تحيا جمهورية مصر العربية حرة مستقلة ,.
الله الوطن ,.,. أم السعد
كل سنة وأنت طيبة
انا لله وانا اليه راجعون
ارجو الدعاء بالرحمة لصاحبةالمدونة بلغني انها في ذمة الله
اللهم ارحمها رحمه واسعه ة اكرم نزلها ووسع مدخلها
اللهم اغفر لها ولنا يارب العلمين
لن انسها ابدا ما حيت
نور
مصطفي
ومبروك ليك ودايما منورني
----------------------
محمد يا عدوي
طب عيني ف عينك كدة
بالذمة هو دة بس سبب الفرحة!!
عموما انا مستنية تحكيلنا ف حكاياتك علي ايام الجيش والسلام سلاح والذي منه شان انا بحب الحاجات دي
الاستاذ/ة نور
آمين ولك مثلها
شكرا بس طالما الموضوع وصل لـ لن (أنسها) ما حييت فمهم اني اقول اني معرفتش ف حياتي رجلا يدعي نور غير نور الدين محمود بطل سلسلة ملف المستقبل
وكمان معرفتش بنت تدعي نور غير نور الممثلة، وزي ما انت شايف صعب شوية علي احدهما انه ينعيني
ياريت لو فيه سوء تفاهم تحاول/ي تفسر/ي، ولو كان مقلب فبكرر شكري ونورت المدونة وياريت تيجي كل يومين
إرسال تعليق