حرام يا..غبي

من كام يوم، كنت ماشية ف شارع الهرم..ايه راجعة من التأمين الصحي.المهم

كنت مش فاكرة بفكر ف ايه، تقريبا ف قياسات النظر اللي اتبهدل معايا دة، قطع تفكيري صوت، لا هو رقيق ولا أجش

بيقول:- البنطلون حرام يا غبية..يا غبية

طبعا أنا كنت ماشية ف محاذاة الراجل؛فمعرفتش ابص أشوف شكله؛ لكن كنت شايفة البنت اللي بيتوجهلها الكلام..طبعا البنت طلعت قدام شوية وخلاص

لكن ربنا رزقه ببنت تانية برضه لابسة بنطلون، فراح موجهلها نفس الجملة:

البنطلون حرام يا غبية

هنا دققت بقي ف ملامح صوته،الغريب انه مكانش بيعاكس، ولا بيستظرف..دة منفعل بجد، وشايل هم النصيحة فعلا..وبيتكلم عن ايمان حقيقي

طبعا أنا -بما ان كل لبسي بنطلونات- حاولت أتراجع شوية لورا عشان مقعش ف مرمي بصره، وبالتالي أنال اللقب الغالي..وقعدت أفكر

الراجل دة غريب جدا

يا تري ايه اللي مخلليه يعمل كدة

وياتري مبيزهقش، والا دة نظام الدعوة الشعبية الجديد، والا ايه الموضوع بالظبط

فقت من تفكيري علي صوته تاني: كلكو اغبيا، البنطلون حرام يا غبية

المرادي كان بيقولها بحرقة أكبر، وطبعا اكتشفت ان أنا صاحبة اللقب المرادي

بهبلي تخلليت عن الحذر وأنا بفكر، فوقعت ف مرمي طلقاته

بصراحة دمي اتحرق..فكرت أرد عليه، أقوله :والشتيمة مش حرام يا غبي!!

وبعدين قلت الطيب أحسن يمكن يكون شارب والا مصدوم والا معقد، يمسكني يلبني علقة، وانتو عارفين..مبقاش فيه أي حد بيتدخل لما يشوف بنت بتنضرب ف شارعنا العزيز

شديت الخطا ومشيت محروق دمي

يعني لو البنطلون اللي انا لابساه حرام يا محترم، الشتيمة مش حرام..وبحلقتك ف اللي رايحة واللي جاية مش حرام..واطلاق الأحكام بدون وجه حق !!..طب تدخلك ف ما لا يعنيك مش حرام

بس سعادة المستشيخ الشوارعي-مش شتيمة-مش شايف غير حرامنا احنا بس

بعد ماهديت فكرت فيها، لقيت ان الراجل دة تلخيص لمواقفنا كلها ببساطة،احنا دايما باصين لبرة، عنينا مجهزة للنظر للخارج بس، زي كشافات العربيات

بتتسلط ع العربيات التانية بس، احنا فالحين قوي

نبص برّانا..انما جوانا مضلم

كأننا نسينا عضو البصر المعنوي، وركزنا ع العضو المادي بس، مع ان ربنا خلقلنا الاتنين

المهم بقي

مع اني بحب المشي قوي..ركبت عشان اخلص م الشارع، واللي ف الشارع