تعرفي كان بقالي كتير قوي مش بحلم-
ياه..معقول..وحلمت ايه بقي-
حلمت أفوز بالجايزة الأولي ف المسابقة-
بس-
وحلمت كمان كريم يفوز-
ها-
وباسم كمان-
طب وانا كمان والنبي-
كدة تبقي واسعة قوي-
الكلام دة دار بيني وبين وليد امبارح، واكتشفنا اننا بنستخسر نحلم كتير، واننا لما بنحلم، بنمنطق حلمنا، ونطبق عليه قواعد الواقع الصارمة مع انهم بيقولوا "الحلم معليهوش جمرك"ومع ان حلمنا ممكن يوسع لحد ما يلم العالم كله..يبقي ليه نحلم ع القد
أنا فاكرة جملة عجبتني قوي -يمكن كانت الحاجة الحلوة الوحيدة-ف مسلسل محمود المصري، كان بيقول : انت عند آخر حلمك..لو بتحلم تكون موظف حتكون، وتقضي عمرك كله ورا مكتب حكومة..لو بتحلم بفلوس حتجيب، لو بتحلم تبقي تاجر حتبقي..أنا بقي،حلمي العالم كله..حلمي ألمس النجوم"..فليه احنا بنضيقها علي نفسنا..دة احنا حتي لما بنيجي ندعي، مش بنطلب الفردوس الأعلي، بنقول"يارب بس ان شاللا آقل حتة ف الجنة"..وأحيانا بنقول المهم مندخلش النار، مع انه دعاء..مع انه حلم
ف الحلم مفيش قواعد..ومفيش حدود..معقول تكون بدأنا نفكر حتي واحنا بنحلم!!..أنا بحلم بالدنيا بحالها
بحلم ليا ولاصحابي ولاخواتي وللبلد..بحلم حلم طويييييل وكبيييييير ووااااااااسع
يساع الدنيا والآخرة
وبحلم أفضل أحلم
وبحلم ييجي يوم أحقق أحلامي كووووولـ..احم..كلها دي واسعة قوي..يعني نقول..نصها!!..تلتها طيب
هناك ٢٦ تعليقًا:
عارفه
كنت بقول من فتره كده اني مش بقول على حاجه بحلم بيها لحد الا لما بحققها
بس بقيت بخاف تخيلي انك بتحققي كل اللي بتحلمي بيه دي تبقي حاجه مرعبه
بس يعني حلمتي انك بتفوزي انتي و باسم و كريم و جيتي على وليد المسكين و خلاص ووسعت قوى
لا العكس هو اللي صح يا أميرة الأحلام
هو اللي حلمه ضاق قوي مش قادر يستوعبني
حاجة تشل
بس غريب حكاية انك تحلمي بأثر رجعي دي
شكرا لمرورك
كان حلمي انى اعلم واتعلم فن
وبالامس فقط كانت اول مرة اكتبها ولاحظت انى بكتبها فى تعريف للناس بنفسي
كتبتها
بتعلم وبعلم فن
من سنة وكام شهر كانت الجملة دي فى تعريفى لنفسي عندنا في مغامير لكن كانت فى خانة الامنيات والاحلام
لكن بالامس كانت فى خانة الوضع الحالى
حقيقي الحلم مش بعيد بس احنا يا بنستخسره فينا
يا بنستعجله
خلينا نحلم مين قد الواحد مننا لما يحقق حلمه
شكرا يا هناء خلتينى اقولها بصوت على
انا حققت حلم من احلامى ويمكن من اهمهم
وخلينا نقول مع أحمد الحضري
آه يا حلم لسة جاي
اتخنق لكنه حي
فيه ف آخر الطرقة ضي؟؟
ولا دي أحلام صبي؟
كإن الخية منصوبة في أفكارك
بترفض حلم متعلق ف وجدانك
كإنك طفل بيتهته حروف الحلم
!!يجييك الحلم ... عصفورة بتصطادك
وبرضه تلطخ الأحلام بطين العلم
من قصيدة(كإن الحلم بيخبط على بابك
أحمد الحضري- ديوان (اقفل عليك الحلم
****
فكرتيني قوي بالقصيدة دي يا هناء
عجبني كلامك عن الفكرة .. حكيك ليها
قصاصة بقى .. هنقول إيه
***
افتكر إني ما باركتلكيش على المدونة
ألف مبكروك يا أستاذة
تحياتي
دينا
Oi, achei teu blog pelo google tá bem interessante gostei desse post. Quando der dá uma passada pelo meu blog, é sobre camisetas personalizadas, mostra passo a passo como criar uma camiseta personalizada bem maneira. Se você quiser linkar meu blog no seu eu ficaria agradecido, até mais e sucesso. (If you speak English can see the version in English of the Camiseta Personalizada. If he will be possible add my blog in your blogroll I thankful, bye friend).
ليكن
واضح أن حضور الحضري قوي جدا هاهنا
فريدة
لم أكف يوما عن اعتبارك فنانة، أحيانا أحسدك علي حسك، وأتمناه
تحياتي
الاخت دينا
يا هلا يا هلا
الله يبارك فيكي يا فندم
مقريتيش بوست قصيدة كإن الحلم!!!
حستهبل وأقول عليه بوست
شكرا ومتحرمنيش من مرورك
صحيح أن الحلم ملوش حدود ويمكن أن يسع العالم، لكني مش شايفه معليهوش جمرك أنا شايف إنه متجمرك وجمركه غالي قوى تقدري تقولى كده إن جمركه على قده والحلم اللى يلم الدنيا تمنه كمان أغلى من الدنيا.. اللى بيخاف يحلم حلم كبير مش عاوز يدفع ثمن كبير وخايف يطلع لفوق قوى هناك عشان مينزلش لتحت قوى هنا.
الحلم الحقيقي صفقة بين عالمنا اللى ليه حدود ومنطق وقوانين وبين عالم تانى لا يعترف بكل ذلك، هو يعطينا فيها ما يظنونه ونظنه هنا مستحيلا ولكنه يأخذ منا أرواحنا وأوقاتنا فى المقابل ، لازم الحلم يبقى صح لأنه غالبا اللى بيحلم حلم حقيقي بيحلمه لمرة واحدة فقط ولو إتكسر حلمه بتتكسر معاه رقبته وروحه وبيبقى عايش جسد فخاري فارغ ينتظر أول طرقة مؤجلة تحيله رمادا وتعلن موته مع حلمه بأثر رجعى.
أستطيع أن أرى في مصر جيلا كاملا عاش حلما جماعيا (أو هكذا توهم) وحين بدا له قرب القطاف وإرتدى أكاليل الغار ومد يده لإنتزاع الثمرة وجدها شوكا وحنظلا وموتا ودمارا .. سقط مضرجا في دماء حلمه الجريح .. حاول أن يحي ولو قدرا يسيرا منه ولو كان ذلك على حساب ما تبقى له من معنى الحياة .. ولما ظن أن برعم حلم قد نجا من الحريق وأن الأحلام لا تزال ممكنة وجد من يصادر نبتة حلمه ليبيعها فى المزاد العلني لحسابه الخاص .. لا شئ يفوق حلاوة تحقيق الحلم إلا مرارة إنكساره وبقدر درجات سلم المجد البلوري تكون طعنات إنكساره وأكثر.. أرى جيلا كاملا كره الحلم أوخافه وأورث كراهيته وخوفه لإبناءه وأحفاده .. أراهم رضوا بأن تكون غاية مناهم من الدنيا الستر والسلامة.. فلا هم أدركوا العلا ولا أراهم أدركوا الستر والسلامة.
أنا معك يا هناء في أننا لا نمتلك خيارا كبشر يحيا حياة واحدة إلا أن نحلم وإلا أن يكون حلمنا محلقا لما وراء المدى وإلا أن نسأل الله الفردوس الأعلي لكننى لست معك فى مجانية الأحلام، فثمن الحلم قد يكون الحياة ذاتها كما أنه قد يعدل الحياة. والحلم الخاطئ أو المكسور قد يساوى حياة ضائعة وأجيالا قادمة تخاف أن تحلم.
تحياتى لك على التدوينة الرائعة
الله عليك يا حسام
هههههههههههههههههههههههههه
طب قولي كلها ما دمتي لسه في نطاق الحلم
ياااه عليك يا حسام لما تسيب نفسك ف الكلام..يا سلام سلم يا سلام(شعر أهو)..والله يا حسام لفتت انتباهي لنقطة ان الحلم الكبير بتكون صدمة عدم تحقيقه بنفس حجمه..بس كمان اللي اعرفه ان الانجاز الحقيقي-اي انجاز- بيبدأ بحلم كبير يعني تفتكر دة سبب لتحديد أحلامنا ومنطقتها،لحد ما تبقي صورة تانية من الواقع..حلو قوي يعني يبقي عندنا واقع حقيقي وواقع خيالي
يع
كمان نقطة الخوف من الحلم دي..صعبة قوي
احنا ناقصين.. انا مش بكره الواقع ولا بدعو للانفصال عنه..أنا كارهة اضطرارنا اننا نحلم بواقعية ووفق مقاييس صارمة
كل التحية لاستاذنا
مادو
احم
مش عارفاك شخصيا بس كنت نفسي اقراك..احم بقي
معرفتش خالص هو ازاي نقرا شعرك ع المدونة المقفلة من كل ناحية "ليلي واخواتها" دي..اعذر أختك لسة مستجدة
تحياتي لمرورك وياريت ترد عليا
بصراحة مفهمتش حاجة من الموضوع خاااااااااااااالص ..ياريت تفهمينا ..وبعدين ده خواطر ولا قصة ولا مقال ولا رغى وخلاص ...ياريت تفهمينا بردوا ..وبعيدن هو كل واحد يقف يتكلم مع زميله يكتب عنه موضوع ؟؟؟..على كده بقى الواحد يكتب مواضيع ويبقى مثقف أوى ..ياريت تخلى المدونة احسن من كده مش عاجبانى بصراحة..اللون بتاعها بيزغلل العين والمواضيع مكررة اوى وخاصة موضوع شاشات تاخذك للجنة ياريت تكتبى تحته منقول
بالراحة علينا يا عم مجهول
هي لا مقال ولا قصة ولا-يوووو الحاجات دي ورانا ورانا-دي مجرد فضفضة..والا اقولك..رغي وخلاص
ناس فاضية بعيد عنك
مين منعك تكتب عن حواراتك مع اصحابك انت حر
موضوع الشاشات التوهيبية مش منقول يا اخـ(ت)ـي..وله تكملته ان شاء الله
مازلت مترددة في نشر نصوصي الادبية هنا اذ انني صنعت هذه المدونة فقط و زي ما انت قلت للرغي..آدي واحد فهم
شكرا لمرورك
ملحوظة مهما يا خالتو ...أنا أخ مش اخت ..العتب على الجزر بقى ابقى امسحى الشاشة
وبررررردوا ردك مش عاجبنى...مثقفين أخر زمن وربنا ..
كدةانا اتأكدت تماما انك مش أخت
مكنش فيه داعي للملحوظة دي الحقيقة
بس تفتكر أخ!!
الله أعلم
تفتكرى انتى ايييييييييييييييه؟؟؟؟؟.بس المدونة عايزة تعديل وكمان مدونات اللى انتى مخلياهم عندك ..جماعة ايه دى بس ياربى
الله يكون في عونك يا هناء
سيبك بقى وركزى فى المهم يا جميلة
يا ترى موضوعك القادم ايه يا قاصة يا ممتعة؟
بص يا معلم مجهول ..بدام انت ولد أكيد مش هتزعل من كلمة يا معلم .. ( وش بيضحك برزالة ).. مجرد مرورك وتعليقك اكتر من مرة مالوش معنى غير انك مهتم بالمدونة بشكل أو بآخر ..والا تبقى بتضيع وقتك ودي حاجة مش كويسة .. قالولك كده وانت صغنن .. صح؟..بالنسبة لان الوحد يكتب اي حاجة ويبقى مثقف .. عادي غيرك بيعملها كتير ومبقتش حكر على حد .. دوس يا عم ولا يهمك .. بس شوف مين هيصدقك .. ممكن أقتنع فعلا اني رئيس الجمهورية .. بس السؤال مجرد اقتناعي ده بيديني صلاحيات الرئيس .. هاسيبلك اجابة السؤال الصعب ده لان شكلك حد دماغه جامدة موت
يا جماعة ياريت محدش يتعب نفسه بالرد ع الأخت مجهولة-اه اخت- لأنها بدأت تلبخ وأنا بدلت تعليقاتهااول بأول..مش عشان حاجة لكن لانها مسألة شخصية تماما للاسف
لو كنت سبت تعليقها الاخير كان اتضح ليكم انها شخصية هيستيرية ربنا يشفي بقي ادعولها
السلام عليكم
تصدقي انا بجد ببقي سعيد اوي وانا بحلم
ونفسي كمان حلمي ده يتحقق
انا بحلم بحاجات كتير بجد
بس ساعات ببقي حاسس انها مش ممكن تتحقق
بس يارب تتحقق
تحياتي
وشكرا علي التعليق اللي منور المدونه عندي
الله علي اختيااااااااراتك يهناء
جميلة جدا اغنية الحجار
ومستنية اسمع اغنيتك القادمة
الكلمات جميلة جدا ، واللحن تحفة
لكن ما يؤثر فيّ بالفعل أداء حجار الرائع
بيغنيها بصوت تعباااان
مرهق
أكنه واحد تعب من كل حاجة، وزهق من سخافات الدنيا وحماقات البشر واحباطاته وهزائمه، فمسك عوده وقعد يفضفض
أعرف أنها تعجبك يا جميلة، لأنها تشبهك
المغنى واجب ... المغني حق
سمع صوته بيعلى ازى وهو بيقول
انا طير مغنى عشي سماي
العود هويتى والناى هوي
وبكرى تسمع الناس غناي
ويقول معى الى قلبه رق
وكأن الحياة هى دي
حريتى هى دى
وجودى ...الجديد ....الفن كل الجميل
حقيقي الله عليكى
واعلي صوتى معاه ومعاكى ونقول
الفن ماله دى الفن نعمة
شكرا يهناء
وشكرا على غنوتك الجديدة عن شيكاغو
إرسال تعليق