أف

ألف سبب يدعوني لكراهية الصيف وسبب واحد يدعوني لحبه..أنه من صنع الله
وطبعا لن أذكر الألف فلا ريب أن الجميع يعيشها الآن..أف
أنتظر الشتاء حتي لو سرق هذا من عمري شهورا

فيه ايه بقي

ف مكتبة مبارك وأنا بحب المكان دة بجد..وف عز ما أنا مشغولة بسي دي برة الشبابيك، قرب مني وكنت لمحته قبل شوية عند قسم علم النفس ..لمحته مرتبك؛ فشلت السماعات وبصيتله بتساؤل
:- ازي حضرتك
:- أهلا وسهلا
:-محمود..... ليسانس حقوق
:- أهلا يافندم تشرفنا..اتفضل
:-هو حضرتك عضوة بالمكتبة من زمان
:-أيوة..أي خدمة!
:- أأ..ممكن أطلب من حضرتك طلب
:- طبعا يا فندم اؤمر
:-ممكن أمسك ايدك
:- ..........

هو الحقيقة أنا مت م الضحك..هيستيريا يمكن..مكنتش عارفة أوقف نفسي وأرد عليه..هو أنا كان ممكن أستجيب لطلبه وأخلليه يمسكها ، بس للأسف مكانتش فاضية، كان فيها الجزء العاشر من الأعمال الكاملة لنجيب وهو كتاب وزنه تقريبا سبعة طن..وخطرلي اني لو اديته علي نافوخه بيه حيتأثر قوي الحقيقة
حاولت أبطل ضحك لاحسن أتفهم غلط وقلتله، لأنه بجد كان مستني اجابة
:- شوف يا بني..الطلب دة ممكن تطلبه من أي بنت ف اي حتة ف الدنيا الا هنا..هنا بنات مكتبات يا بني ..ممكن بجد تحط نفسك ف مشكلة ..أنت غشيم ومن واجبي أنصحك
ونزلت وانا هلكانة ضحك..طلعت الشارع وأنا هلكانة ضحك..وخطرلي ان حتي الأوغاد دلوقتي مستعجلين ومش عندهم وقت يخططوا صح واترحمت علي استيفان روستي الحقيقة
لكن وانا واقفة عشان أركب قصاد المكتبة..اكتشفت ان أنا اللي غشيمة ..لمحته خارج م الباب، وايده ف ايد بنت ..
ولما عدي الاتوبيس قدامي، لقيته قاعد فيه، وبيمسك ايد بنت..ولما ركبت الميكروباص..لقيته ف الكرسي اللي قدامي، بيوشوش البنت اللي جنبه وعاوز يمسك ايدها..وكان واقف ف نفس الوقت قدام الجامعة بيحاول يمسك ايد بنت..وقدام الجنينة، وف مركب ع النيل..بل ممكن أحلف اني شفته تحت بير السلم بيلاعب بنت الجيران أم ست سنين وعاوز يمسك ايدها..فجأة الضحك انقلب خوف والخوف انقلب رعب..هو فيه ايه
فيه ايه بجد

حين تستيقظ سعيدا بلا سبب..لا يوجد ما يقلق بالك..تتجاهل المضايقات اليومية الصغيرة..تشعر أن الأمور علي ما يرام، وأن كل ما هو سيء في هذه الدنيا سيتحسن غدا..لا يضايقك حر ولا عرق ولا زحام..تفكر بنعومة وتتكلم بنعومة وتبتسم بنعومة..تطور رؤيتك لنفسك وللناس..
لحظتها يتوجب عليك أن تعرف أن هناك شيئا من اثنين يحدث لك:
-أنك تحب وتحب
-أو أنك علي وشك الرحيل

جنون

أتطلع لجنونهم عبر الشارع المشتعل..فوضي الفرح تكتسح ويصبح لها فجأة الكلمة الأولي

أضبط نفسي تتراقص علي الهوجة؛ فأقرر أن من حقها أن تجن قليلا..

ألوّن وجهي وروحي وأقفز خارج البيت ..

الأمواج البشرية تبتلعني،فأغرق بينهم

عدوي السعادة تنتقل سريعا في جو محمل بالغبار..أعلو،لارتفع الي عين ذلك الطائر هناك، أراني وسطهم بألواني وحيدة..منضبطة..

تبا للوقار وسط هذا الخضم

أنسحب من بينهم،غير قادرة حتي علي التصفيق..أقاوم حتي أنفصل

أعود لمكاني بالأعلي الكئيب..وأعاود التطلع لهم بحسد..

تطلعت لمرآتي أحاول محو الألوان؛فصارحتني :

-تحتاجين الي هموم اكبر ومآس اشد؛لتعيشي جنونهم باستمتاع

تخيل نفسك سواق

أوك!..انت دلوقتي سواق..راجل علي باب الله طفحان الكوتة، وعايش..شقيان وتعبان ومقضيها..بتقول أهم حاجة العيال..أكبرهم وأربيهم وأخلليهم حاجة حلوة..وكل ما الدنيا تضيق، تبص لعيون ولادك وتقول معلش..هم قرة عيني، وبكرة الدنيا حتبقي أحلي بيهم..ييجي رمضان، تعيش زي اي كادح ف البلد..شقا وتعب طول النهار، والمغربية تفطر، وتتلم مع الولية والعيال قدام التليفزيون، تاكل الكنافة او القطايف وتقعد تتفرج علي المسلسلات..تتفرج مثلا علي يسرا ف قضية رأي عام، وتتعاطف معاها، وتسمع مصمصة شفايف مراتك كل دقيقة وهي بتدعي ع العيال ولاد الحرام اللي اغتصبوها..قاعد ملموم وحواليك العيال، سايبهم يتفرجوا ويتعلموا..فجأة وف عز فرحتك بان الكلاب دول حياخدوا جزاءهم، ييجي (رامي)ابن الوزير شكري جلال، ويعاتب أبوه علي انه سابه وانشغل عنه، لدرجة انه رماه للسواق بتاعهم يربيه..وتسمع علي لسانه جملة:"واحد تربية سواق،عاوزه يطلع أحمد زويل يعني"..أخخخخ

يعني ايه..تعرق..تتبل..مش عارف تبص لعيالك، ونفسك الارض تنشق وتبلعك، بس متخيل وشوشهم عاملة ازاي..الجملة دي مش مجرد جملة وتعدي، دي من الجمل اللي بتعلم..وتفضل معلمة عمر كامل، ومش مبالغة لو قلنا انها ممكن تهدم معنويات فئة كاملة من الناس،وتجرح شعور كل السواقين وولاد السواقين، لأ وتدي العيال شعور بالدونية صعب قوي يتمحي، وذريعة للغلط والانحراف ..وكأن المؤلف متخيل ان"احمد زويل "اصلا كان ابوه وزير، والا سفير..وكأن الشاب عشان يبقي مستقيم وابن حلال وناجح، لازم يتربي علي ايد واحد من الكبارات،، وكأنك انت-السواق-متعرفش تربي، ولا تعلم، ولا تخرج أحمد زويل

الجملة دي

تتويج للحوار السخيف المفتعل اللي مليان خطابية وتقليدية وملل..وبعيد عن التحليل النقدي للمسلسل، وبعيد عن كل الكلام اللي حنقوله عن مسلسلات رمضان..الجملة دي..تقرف..

بلا ورد..مع حبي

أكره الورد
قد يكون اعترافا مهينا لشاب، وعارا لا يمحي لفتاة، لكنها حقيقة مع ذلك..بالفعل أكره الورد، أقدّر له رقته..لكنني أكره استكانته المميتة فوق منضدة خشبية، وملمسه المخادع،في يد عاشق هائم، وعمره القصير..أكره موته السريع البطيء


أكره ذبوله حين احتضاره، وأكره مشاعري تجاه قتله..

قد تشعر أن هذه الكائنة الصغيرة أرق وأجمل من تفلسفي، وقد تعتبرني خشنة، قاسية القلب، هذا رأيك
لكن يحق لي رؤية العكس، علي الأقل أجد نفسي أرق وأبسط من تلك التي تستمتع بوضع جثة يابسة بين دفتي كتاب، تتأملها كل حين ارضاء لذكري أو غرور حب كان
أكثر نبلا من ذلك الذي ينتزعها من جنتها تقربا لحبيبة متمنعة..لكن
ليس هذا سبب كرهي للورد..لا أحبه والسلام..ان الهدية بالنسبة لي، ليست اسما وشكلا ، بقدر ما هي معني
وأنا أجد في الكون ما هو أجمل وأرق و أكثر دواما من الورد، ولو كان لي أن أهدي حبيبا،لن تكون ابدا وردة الهدية.. سأمنحه رسوخ وشموخ شجرة،وظلالها الحنونة

..أو مزيج من رقة طائر وقوته، وايمانه

أو تطلعك لامتلاك نجمة بعييييدة تشبهه،..

أو دفء غنوة لمنير

تلك هداياي لمن احب

احلم..بالعقللللل

تعرفي كان بقالي كتير قوي مش بحلم-

ياه..معقول..وحلمت ايه بقي-

حلمت أفوز بالجايزة الأولي ف المسابقة-

بس-

وحلمت كمان كريم يفوز-

ها-

وباسم كمان-

طب وانا كمان والنبي-

كدة تبقي واسعة قوي-

الكلام دة دار بيني وبين وليد امبارح، واكتشفنا اننا بنستخسر نحلم كتير، واننا لما بنحلم، بنمنطق حلمنا، ونطبق عليه قواعد الواقع الصارمة مع انهم بيقولوا "الحلم معليهوش جمرك"ومع ان حلمنا ممكن يوسع لحد ما يلم العالم كله..يبقي ليه نحلم ع القد

أنا فاكرة جملة عجبتني قوي -يمكن كانت الحاجة الحلوة الوحيدة-ف مسلسل محمود المصري، كان بيقول : انت عند آخر حلمك..لو بتحلم تكون موظف حتكون، وتقضي عمرك كله ورا مكتب حكومة..لو بتحلم بفلوس حتجيب، لو بتحلم تبقي تاجر حتبقي..أنا بقي،حلمي العالم كله..حلمي ألمس النجوم"..فليه احنا بنضيقها علي نفسنا..دة احنا حتي لما بنيجي ندعي، مش بنطلب الفردوس الأعلي، بنقول"يارب بس ان شاللا آقل حتة ف الجنة"..وأحيانا بنقول المهم مندخلش النار، مع انه دعاء..مع انه حلم

ف الحلم مفيش قواعد..ومفيش حدود..معقول تكون بدأنا نفكر حتي واحنا بنحلم!!..أنا بحلم بالدنيا بحالها

بحلم ليا ولاصحابي ولاخواتي وللبلد..بحلم حلم طويييييل وكبيييييير ووااااااااسع

يساع الدنيا والآخرة

وبحلم أفضل أحلم

وبحلم ييجي يوم أحقق أحلامي كووووولـ..احم..كلها دي واسعة قوي..يعني نقول..نصها!!..تلتها طيب

لماذا أسافر عنك بعيدا!!

ذاك التساؤل الذي يطرحه الشاعر نزار شهاب الدين في قصيدته الرئيسة بديوانه الأول..والذي يصعب تحديد اجابة حقيقية ووافية عنه
لماذا نسافر، نتغرب مكانيا او داخل ذواتنا!!
وهل نختار الرحيل، ام نجبر عليه..لماذا
لا تتوقعوا اجابة مني، انا التي تكره كل علامات الاستفهام، وتشدد الكراهة علي "لماذا"..لماذا أي شيء يا نزار
يقول لها الشاعر:
"ألم تسمعي عن هروب المخافة!!
ألم تشعري في عناق الوداع دبيب ارتجافة!"
******
الداء معروف ايتها الحبيبة الوطن..
كلنا مرضي به،ونحن لا نرحل الا حين يرحلوننا قسرا
يسوقوننا الي الضياع، لننفق في غربتنا سنواتنا و احلامنا وبقايا صورة باهتة لحضنك
لماذا..
وماذا بقي لنبقي

"الم تسألي أحدا عن شعيراته البيض تلك، متي ولدت!
عن أحيلامه الخضر تلك..متي وئدت!
عن قصائده السود تلك..متي كتبت
ومتي حرقت!!
عن عيون حبيبته الذهبية
كيف ذوت!
ألم تسألي لم ألغوا زفافه!"
******
لم يعد المكان لك، فارحل
هكذا يصل المعني ويترسخ..فيختار الواحد منا الرحيل..بعيدا عنها
ليكتشف مأساته في النهاية
انه ينسلخ عن أسباب وجوده
ينسلخ عن الماضي ويتبرأ من الحاضر..ويفقد كل حلم آت..
يهرب!!
يرحل
يُرّحّل
يُهّجّر
المعاني واحدة..في كلها، ستنكسر لمعة عينيه في بلاد غريبة،وتذوي ابتسامة وجده، في مكان ليس له..تتخبط احلامه،مغتربة ثم تتهاوي، دون أن يدرك ما تحقق منها وما مات..سينحني ظهر حزنه، يعتاد التحدب، وتعرج ذاكرته،فيعتاد العرج..

"علي شاطيء الغربة السرمدي
أسائل نفس
"متي سوف ننسي!!
وأرمي حصاة الي الماء..ان غرقت سوف أنسي
وتغرق
أذكر لهوي علي عشبك المستظل
بأروع شمسِ
وأرمي حصاة
فتغرق..أذكر أيام درسي
مدرج كليتي
دفتري وطلاسم شرح كأروع طمسِ
رفاق جنوني وضحكا سرقنا براءته من طفولة أمسِ
حصاة،وتغرق
همسات حبي العذاري
متاهات شكي ويأسي
حصاة..وتغرق
لحظة قالت:أحبك في نصف همس
حصاة..وتغرق..
لحظة حددت ميعاد عرسي
حصاة..
وتطفو..
وأذكر أول ليلةِ حبسِ"
******
يا كل هذه العذابات المجتمعة في ركن قصيّ من الذاكرة..في ركن رمادي الملامح لاذع الطعم!
يا كومة الآلام والحنين والسعادات المتراكمة، مهترئة الاطراف،متداخلة الأنسجة!!
يا طعم دمي ومرارة سجني، ويا لون الحب وأغاني الشتاء!!
من جمعكم معا، مكونا منكم هذا الخليط العجيني العجيب، فما أنا بقادر –في غربتي-علي عشقه،ولا بغضه..يمتد خط عريض مهلهل منه بأقصي الذاكرة، الي خليط مماثل بالقلب، يندمج فيه الكره بالحنين!!

"أعود!..متي!
أنت قولي متي
فما عاد قلبي شديد احتمالٍ
وما عدت ذاك الفتي
وما عاد البيت بيتي
ولا الحي حيي
ولا الناس ناسه
فهل تحرسين دمي من كلاب الحراسة!!"
*******

ثم أتوقف في غربتي..أمسح عيني ذعرا..أين أنا..وأي كابوس ليلي
أبعدني عنك، وأتي بي هنا
أتوقف في غربتي
ألتفت خلفي
فأري البحر بيني وبينك
لم تخلق عيناي لعبور المياه..ولا لتخطي الجبال..
أريدك..والآن
أريدك وكفي..وفي مياه هذا البحر البيني وبينك..ألمح صورة لآخر، ليس أنا..
وفي مياه هذا البحر البيني وبين نفسي..ألمحني أضرب الماء..ألمحني أتجه للمستحيل..ألمحني أقاتل الموج..أطفو وأغرق..
أصارع غرقي، وأبصق باتجاه سنوات غربتيّ المتباعدة..أقاتل الماء..أطفو وأغرق،..أصارع غرقي..متجها ليد شبحية بعيييدة
تطفو، وتغرق

"متي..
لا تمُدي يدا
أشيري بطرف خفيّ
وسوف أمد يدا
ويدا
ويدا
وسوف أمد الخطا
أتجاوز ذا النهر
ذا البحر
ذاك المدي
أتجاوز حزنين..لا حسب حزني
وحزن الذي ضاع مني سدي
وأعود فتي أمردا
بريء الرؤي
اسود الشعر..غض الملامح
يزرع احلامه الخضر فيك
فتنبت في كل يوم غدا"

********************************

كان الحلم بيخبط..علي بابك

للمرة ال........الكتييييييييير قوي، برجع للديوان دة

وللمرة ال.....الكتير قوي وواحد، بتوقفني القصيدة دي

بتمس احساسي، وبتلمس كائن حي جوايا..تفتكر يا

صاحبي..من سمات الابداع اللي بجد، انه يكون نهريّ الطعم، بحريّ التأثير!!

كل ما تشرب،ترتوي..كل ما تشرب، تتلسوع، كل ما تاخد منه،يزيد!!

كل ما تزوره،تـ(كتشفه)!!00

مش حعرف أنطق بكلمة عن الحالة، لأن القصيدة بتقول كل حاجة

البوست دة هو القصيدة..بس في رحاب القصيدة،قد ايه احلام خبطت علينا،

!!وخوفنا نفتح/كسلنا/استغبينا

بستأذن صديقي الشاعر،يشرف مدونتي بنشر القصيدة

اسمع يا سيدي

كإن الحلم بيخبط على بابك
مخالف كل أعراف الحياة
مخالف للقيود اللابده جوا الآه
وعارف إن كل الحسن قدامك
فخايف ليه تمد اليد تتلقاه
****
كإن الحلم محبوبك بتتمناه
قمر واقف على الشباك بتترجاه
تفضفضله وتشكيله من القسوة
فيسمعلك ويتمايل بحنية
فتنسى الهم .. تتمايل من النشوة
فخايف ليه تمد اليد تتلقاه
****
كإن الخية منصوبة ف أفكارك
بترفض حلم متعلق ف وجدانك
كإنك طفل بيتهته حروف الحلم
يجييك الحلم...عصفورة بتصطادك !؟؟!!
وبرضه تلطخ الأحلام بطين العلم
****
صبحت سجين لأفكارك ؟؟!!
صبحت سجين لهذا الوعي بيهدك
وللأفكار بتتلائم عليك وتحل في جسمك
برغم الحلم بيلالي
كأنوار الفرح واقفة
وبتودع بواقي الهم
****
فلو هاتحل وجدانك من الأحلام
فلازم تشتري دماغين على دماغك
وتستحمل صداع الفكر
ولو هاتحل وجدانك من الأحلام
ليه بتلملم حروف الكلمة من إعلان
بيتعلق ف عرض الحلم
****
حروف الكلمة مدهونه بسمن الحلم
فيا تلحق وتاكلها
ياييجي الصبح تفقدها فحر الوعي
وتنساها
***
ولسة الحلم بيخبط على بابك
مخالف كل أعراف الحياة
مخالف للقيود اللابده جوا الآه
وشايفه عنيك زهور الحلم قدامك
فخايف ليه تمد اليد تتلقاه

أحمد الحضري-ديوانه الأول

اقفل عليك الحلم

!!لسة بنحلم

واحنا لسة صغيرين، كان الحلم بالنسبالنا عالم غريب..أشكال غريبة، ألوان،ناس غريبة..عالم هاااادي
بالنسبة لطفل..كل حاجة غريبة
لكن غريب ملموس، غير غريب مش ملموس..غريب طاير ف الجو
غريب علي بعد خطوة من خطواتك، كل ما تخطيها..كل ما يبعدها
غريب
غرييييييييب
كنا بنصحي بنضحك
ونلاقي ايدين تطبطب علينا، ونلاقي شفايف تقول"اللهم اجعله خير
واحنا صغيرين، كانت متعة الحلم رفاهية وترف
انهاردة
الحلم ملجأ
انهاردة
بنهرب للحلم..بنعيش بالحلم..وبنموت ع الحلم
واحنا كبار
الحلم بالنسبالنا عالم صديق..أشكال ..ألوان..ناس متغربة..عالم دوووشة
بالنسبالنا، كل حاجة مألوفة..لكن مألوف ملموس، غير مألوف مفقود
مألوف ساحر
مألوف علي بعد صباع من صوابعك،كل ما تمدها مقداره، كل ما تبعد مقداره
انهاردة بنصحي من الحلم،عطشانين..شفايفنا مشققة
انهاردة بنصحي من الحلم ..نحلم
ونحلم
ونحلم